Vrasësi me pagesë Henrik Hoxhaj, i pandehur në dosjen “Plumbi i artë”, ka dëshmuar sërish këtë të hënë në Gjykata e Posaçme, duke dhënë detaje të reja mbi atentatin e dështuar ndaj biznesmenit Lulzim Masha dhe motivet që, sipas tij, qëndrojnë pas porosisë së vrasjes.
Hoxhaj deklaroi se Nuredin Dumani i kishte ofruar 100 mijë euro për vrasjen e Lulzim Mashës dhe 150 mijë euro për vrasjen e të birit. Sipas dëshmisë, porosia për eliminimin e djalit ishte dhënë nga Eldi Dizdari, i përshkruar nga Hoxhaj si një prej figurave të trafikut të kokainës. Meqë djali nuk po lokalizohej, plani, sipas tij, ishte që të goditej i ati për ta nxjerrë në lëvizje të birin.
Në seancë u shpjegua edhe motivi i pretenduar. Hoxhaj tha se vëllai i Eldi Dizdarit kishte pasur një lidhje me vajzën e Lulzim Mashës dhe se gjatë kësaj periudhe ishin kaluar pasuri me vlerë miliona euro në emër të saj. Pas ndarjes, sipas dëshmisë, vajza e Mashës nuk kishte pranuar t’i kthente pasuritë vëllezërve Dizdari për t’i kaluar në një emër tjetër.
“Porosia fillimisht ishte për djalin e Lulzim Mashës, por nuk e gjetëm. Nuredini më tha se vajza e Lulzim Mashës kishte qenë e fejuar me një nga vëllezërit Dizdari dhe pas ndarjes nuk u kthyen disa para apo prona që ishin kaluar në emër të tyre”, deklaroi Hoxhaj, duke shtuar se porosinë e kishte marrë në Gjilan të Kosovës, ku Dumani qëndronte në atë kohë.
Sa i përket armës, Hoxhaj theksoi se ajo ishte siguruar nga Aleksandër Baho, i njohur me nofkën “Sakati”, ndërsa Dumani kishte ndërmjetësuar lidhjen. Sipas tij, arma iu bllokua Skerdi Tases në momentin e atentatit. Hoxhaj tha se kishte kryer prova dy ditë para ngjarjes dhe se gjatë atentatit dëgjonte komunikimet e policisë përmes radios.
Deklarata e sotme është pritur me rezerva, pasi më herët Hoxhaj kishte pohuar se nuk e dinte për llogari të kujt Dumani kishte marrë porosinë. Po ashtu, ajo bie në kundërshtim me dëshminë e vetë Dumanit, i cili ka deklaruar se porositësi i ngjarjes ishte Aleksandër Baho. Si Baho ashtu edhe Eldi Dizdari dyshohet se ndodhen aktualisht në Dubai.
Atentati ndaj biznesmenit Lulzim Masha, administrator i një shkolle private në Tiranë, u regjistrua më 18 janar të vitit të kaluar në zonën e Liqenit të Thatë. Një person qëlloi me pistoletë drejt automjetit tip Benz që drejtohej nga Masha, i cili udhëtonte i vetëm. Nga të shtënat nuk pati persona të lënduar.
