Agron QGjykata e Posaçme për Korrupsionin dhe Krimin e Organizuar ka shpallur sot vendimin për Agron Qafën dhe Florenc Çekrezin, të arrestuar në kuadër të operacionit “Plumbi i Artë”. Pas një gjykimi të zhvilluar me rregullat e gjykimit të shkurtuar, trupi gjykues i përbërë nga gjyqtarët Eglantina Mikani, Bib Ndreca dhe Olkeda Lice, ka marrë vendimin përfundimtar.
Agron Qafa u shpall fajtor për veprën penale të “Vjedhjes me dhunë”, në bashkëpunim dhe në formën e grupit të strukturuar kriminal, si dhe për veprën penale të “Grupit të strukturuar kriminal”. Fillimisht, Qafa u dënua me 12 vjet burgim, por pas aplikimit të nenit 406 të Kodit të Procedurës Penale, dënimi iu ul me 1/3, duke u dënuar përfundimisht me 8 vjet burgim. Ai do të vuajë dënimin në një institucion të sigurisë së lartë, me dënimin që fillon nga dita e arrestimit të tij.
Florenc Çekrezi u shpall fajtor për veprën penale të “Shkatërrimit të pronës me eksploziv” dhe “Mbajtja pa leje dhe prodhimi i armëve, armëve shpërthyese dhe municionit”. Fillimisht, Çekrezi u dënua me 5 vjet burgim, por pas aplikimit të nenit 406 të Kodit të Procedurës Penale, dënimi iu ul me 1/3, duke u dënuar përfundimisht me 3 vjet e 4 muaj burgim. Ai do të vuajë dënimin në një institucion të sigurisë së zakonshme, me dënimin që fillon nga dita e arrestimit të tij.
Prokuroria e Posaçme kundër Korrupsionit dhe Krimit të Organizuar kishte paraqitur kërkesën për dërgimin për gjykim të çështjes penale ndaj Agron Qafës dhe Florenc Çekrezit. Të dy të pandehurit u gjykuan për veprat penale që lidhen me aktivitetet kriminale në kuadër të operacionit “Plumbi i Artë”. GJKKO vendosi gjithashtu që provat materiale të disponohen në përfundim të gjykimit të procedimit të lidhur që gjykohet pranë kësaj gjykate dhe shpenzimet procedurale të ngarkohen të pandehurve solidarisht.
Kundër këtij vendimi lejohet ankim brenda 15 ditëve në Gjykatën e Posaçme të Apelit për Korrupsionin dhe Krimin e Organizuar, duke filluar nga dita e nesërme e njoftimit të këtij vendimi.
