Radhët e gjata në pikat kufitare të Greqisë janë rikthyer përsëri, dhe ditën e sotme një gjë tillë ka ndodhur në doganën e Kapshticës.
Ashtu siç ishte parashikuar edhe ditën e sotme pala greke ka mbyllur sportelet menjëherë pasi është plotësuar kuota prej 300 personash. Kjo ka krijuar rradhë të gjata, pasi fundjava ka edhe fluks të madh emigrantësh që largohen nga vendi ynë në drejtim të shtetit grek.
Ndërkohë e njëjta gjë ka ndodhur edhe ditën e djeshme, ku pas orës 13:00 pala greke e mbylli sportelin, pasi u plotësuan kuotat duke lënë shqiptarët në pritje të ditës së nesërme.
Kujtojmë se ky vendim ka hyrë në fuqi që me 17 gusht 2020, ku thuhej se nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke, si pasojë e situatës së krijuar nga COVID-19.
