Bashkia e Durrësit ka planifikuar 961 milionë lekë të tjera, për menazhimin e mbetjeve, të cilat do shkojnë në inceneratorin e Tiranës. Kandidati i Partisë Demokratike për Bashkinë e Durrësit, Igli Cara publikoi programin e Bashkisë së Durrësit për vitin 2023, ku parashikohet që 28 % e buxhetit të shkojë për menaxhimin e mbetjeve. Përmes një postimi në rrjetet sociale, Cara deklaroi se bashkia nuk ka një plan strategjik për menaxhimin e këtij sektori por i gjithë qëllimi është që t’i shërbehet oborrit të kryeministrit.
“961.000.000 lekë të rinj të barabarta me 28% të buxhetit të 2023 të Bashkisë së Durrësit do të shkojnë per menaxhimin e mbetjeve.Taksat e qytetarëve durrsakë planifikohen për inceneratorin e Tiranës dhe transferta qeveritare. Dhe më e paimagjinueshme është që pas 23 viteve nuk ka akoma një plan strategjik zhvillimi apo menaxhimi të këtij sektori. E kuptueshme përse behet! Duhet t’i shërbehet oborrit të Ramës!” deklaroi Igli Cara, kandidat i PD për Bashkinë e Durrësit.
Bashkia e Durrësit dhe e Kavajës vetëm në fundvit, kanë depozituar në llogaritë e Klodian Zotos, i shpallur në kërkim për aferën e inceneratorëve, në total rreth 120 mijë euro për dërgimin e mbetjeve në landfillin e Sharrës. Afera e inceneratorëve, e cilësuar si afera e shekullit ka përfshirë disa bashki të vendit.
