Një ngjarje e rëndë ka ndodhur mëngjesin e kësaj të diele në Kukës, ku 4 persona janë përleshur në një lokal në Kukës. Personat e përfshirë në konflikt janë kushërinj dhe është dashur ndërhyrja e policisë për të parandaluar përshkallëzimin e sherrit. Të 4 personat të moshës 22, 35, 41 dhe 50 vjeç janë konfliktuar për motive të dobëta, fizikisht dhe me send të fortë shufër hekuri, ku si pasojë 41-vjeçari ka marrë plagë të rënda dhe është dërguar në spitalin e Traumës.
Njoftimi i Policisë:
Ndërhyrja e menjëhershme e shërbimeve të Policisë parandalon përshkallëzimin e mëtejshëm të një konflikti në një lokal në qytet, ndërmjet 4 shtetasve, të afërm të njëri-tjetrit. Vihen në pranga 2 shtetas të përfshirë dhe procedohen në gjendje të lirë 2 të tjerë. Sekuestrohet sendi i fortë (shufra prej hekuri) që u përdor gjatë konfliktit për motive të dobëta.
Menjëherë pas njoftimit se mesditën e djeshme, në ambientet e jashtme të një lokali në qytetin e Kukësit, 4 shtetas ishin konfliktuar për motive të dobëta, fizikisht dhe me send të fortë, shërbimet e Komisariatit të Policisë Kukës organizuan punën dhe shkuan në vendngjarje, për të zbardhur rrethanat e rastit dhe për të nxjerrë përpara përgjegjësisë penale, përgjegjësin/t.
Për shkak të dëmtimeve gjatë konfliktit, shtetasi po merr ndihmë mjekësore në Spitalin e Traumës, ku është jashtë rrezikut për jetën.
Gjithashtu, u gjet dhe u sekuestrua si provë materiale, sendi i fortë (shufra prej hekuri) që dyshohet se u përdor gjatë konfliktit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
