Sfida e U-19 të Kategorisë Superiore, Football Republic dhe Teutës në kompleksin e ekipit vendas ka degjeneruar në dhunë. Ndeshja ka përfunduar në barazim 2-2, por kur sfida ishte 1-1 arbitri akordoi një penallti për Football Republic i cili u shndërrua në gol nga Hodo, më pas barazimi 2-2 erdhi nga Elezi në minutën e 93 dhe pas një minuti doli me karton të kuq.
E gjitha nisi nga pakënaqësia e rezultatit ku një futbollist i Football Republic debatoi me portierin kundërshtar dhe aty nuk munguan as grushtet dhe shtyrjet. Vlen të theksohet se edhe prindër të lojtarëve të rinj u futën në fushë dhe nisën të konfliktoheshin. Në lidhje me këtë ngjarje të pahijshme ka reaguar dhe FSHF e cila dënon rêndë këtë dhunë dhe i kërkon policisë që të marrë masa të menjëhershme për të arrestuar autorët e ngjarjes së rëndë dhe kërkon nxjerrjen e tyre para gjykatës, bazuar në Kodin e ri Penal.
Deklarata nga FSHF:
Federata Shqiptare e Futbollit dënon ashpërsisht dhunën e ndodhur sot në ndeshjen Football Republic-Teuta, e vlefshme për Grupin B të Kategorisë Superiore U-19.
FSHF i bën thirrje Policisë së Shtetit të marrë urgjentisht masat për të arrestuar autorët e ngjarjes së rëndë dhe kërkon nxjerrjen e tyre para gjykatës, bazuar në Kodin e ri Penal. Dëshirojmë të theksojmë se në shume raste Policia e Shtetit nuk ka vepruar në kohë dhe autorët e ngjarjeve të mëparshme ndodhen ende të lirë.
Një thirrje shkon dhe për sistemin gjyqësor në Shqipëri, që duhet të zbatojë me rigorozitet Kodin Penal, i cili ruan shenjtërinë e fushës së blertë. FSHF nuk do të lejojë në asnjë çast nëpërkëmbjen e lojës më të dashur të shqiptarëve nga sjelljet e turpshme të disa prindërve dhe autoriteve që nuk reagojnë në kohë.
