Ministrja e Shëndetësisë dhe Mbrojtjes Sociale Ogerta Manastirliu, ka inspektuar punimet për rindërtimin e Spitalit dhe maternitetit të ri të Kukësit.
Manastirliu nënvizoi se pavarësisht situatës së vështirë të pandemisë, puna për transformimin e sistemit shëndetësor nuk ka ndalur.
Sa i përket vaksinimit, ministrja tha se procesi ka vijuar dhe se deri tani kanë marrë dozën e parë të vaksinës 10 mijë mësues.
“Arsimtarët gjithashtu po vijojnë procesin e vaksinimit në të gjithë vendin, tashmë janë më shumë se 10 mijë arsimtarë të cilët janë vaksinuar.”, u shpreh Manastirliu nga Kukësi.
Reagimi:
“Puna jonë edhe në këtë vit të vështirë të pandemisë nuk ka ndalur për asnjë moment, nuk ka ndalur në drejtim të investimeve tona, të kantierit të shëndetësisë, nga Kukësi, në Lezhë, në Berat, në Durrës, në Tiranë gjithashtu që është kantieri më i madh i transformimit të QSUT-së, por edhe në gjithë spitalet e tjera, sikurse është spitali i ri memorial në Fier, i cili pritet të finalizohet shumë shpejt.
Kemi përfunduar vaksinimin e mjekëve, infermierëve dhe për të siguruar maksimumin e efektivitetit të procesit të vaksinimit dhe mbrojtjen e gjithë personelit tonë shëndetësor po vijon vaksinimi me dozat e dyta. Ndërkaq vijojmë në të gjithë pikat e përqendruara të vaksinimit të vaksinojmë edhe të moshuarit +80 vjeç ku vaksinimi vijojn edhe aty. Arsimtarët gjithashtu po vijojnë procesin e vaksinimit në të gjithë vendin, tashmë janë më shumë se 10 mijë arsimtarë të cilët janë vaksinuar.”
