Kryeministri Rama ditën e djeshme bëri të ditura masat ekonomike të ndërmarra për të parandaluar një krizë ekonomike, duke u shprehur madje se kishte reduktuar disa konçesione në mënyrë që paratë t’i kanalizonte në drejtimet ku ka dhe do të ketë nevoja imediate.
Në këtë plan financiar prej 7 pikash, qeveria ka parashikuar një fond prej 370 milionë dollarësh dhe natyrshëm ka njerëz që pyesin se ku do gjendet kjo sasi e konsiderueshme parash.
Mbrëmjen e sotme, ministri i Rindërtimit, Arben Ahmetaj, i caktuar nga kryeministri, Edi Rama, në krye të menaxhimit të planit, i ftuar në Euronews Albania ka thënë se këto para janë siguruar nga riaolokimi i shpenzimeve (rishikimi i buxhetit të shtetit) dhe zgjerimi fiskal (rritja e deficit).
Ahmetaj theksoi se, plani financiar për COVID-19 do ta rrisë borxhin publik të Shqipëri, duke e çuar atë në nivelin 67% të prodhimit të brendshëm bruto.
“Ka dy mënyra për t’i gjetur dhe janë gjetur. Mënyra e parë është rialokimi i shpenzimeve siç ka ndodhur, mënyra e dytë është zgjerimi fiskal, në shembullin, traditën dhe nevojën e të gjitha vendeve që po kalojnë në të njëjtën situatë. Kemi rritur deficitin nga 2.2% në 3.9%. Arsyeja kryesore e rritjes së deficitit është rënia drastike e të ardhurave për shkak të ngadalësimit të ekonomisë që këtë muaj”, deklaroi ministri.
I pyetur nëse është i dëmshëm rritja e deficitit gati në 4% dhe pse si zgjidhje alternativë nuk janë prekur koncesionet, Ahmetaj la të kuptohej se po priten skenarë të tjerë për të ndërhyrë në këtë sektor.
“Jo vetëm është e shëndetshme, por është e domosdoshme, sepse nuk ka rrugë tjetër. Praktikisht nuk ka rrugë tjetër”, tha ai.
Sipas tij, në muajin mars mund të ketë një rënie prej 70 milionë dollarë të ardhurash të munguara për arkën e shtetit, ndërsa për muajin prill, rënia e të ardhurve tha ai mund të shkojë deri në 120 milionë dollarë.
Një ditë pas publikimit të planit finaciar “gazetareforma.al” zbuloi një skandal që lidhet me fituesin e tenderit për blerjen e maskave respiratore me valvul FPP1 të shpallur ditën e sotme nga OSHEE.
Në dokumentacionin e zbuluar nga “gazetareforma.com” shihet se tenderi është hapur më 12 mars 2020 dhe është mbyllur më 17 mars, ndërkohë që shpallja e fituesit është bërë ditën e sotme.
