Një 15-vjeçar në Durrës po lufton për jetën pas një akti dhune që ka tronditur qytetin. I mituri mbërriti në spital me plagë të rënda në gjoks, ndërsa njëra prej goditjeve me thikë kishte depërtuar drejt zemrës. Mjekët kryen menjëherë një operacion urgjent për t’i shpëtuar jetën, por adoleshenti vijon të jetë i intubuar dhe në gjendje kritike.
Kirurgu Fitim Shini, i cili po ndjek rastin, deklaroi se 15-vjeçari u paraqit në urgjencë me katër plagë të thella në kraharor, një nga të cilat i shkaktoi dëmtime serioze në zonën e zemrës. Ai konfirmoi se i mituri ndodhet në reanimacion dhe se situata është tejet e rëndë.
Ngjarja e rëndë nisi nga një koment në rrjetet sociale mes dy adoleshentëve, një konflikt virtual që mori përmasat e një tragjedie. Të rinjtë vendosën të takoheshin në zonën “Laguna e Karavastasë”, në ish-Kënetën e Durrësit, me pretendimin për t’u sqaruar. Por takimi u shndërrua në një përplasje të dhunshme mes dy grupeve, të shoqëruar me sende të forta dhe agresivitet të papërmbajtur.
Gjatë sherrit, një 14-vjeçar me inicialet M.K. goditi katër herë me thikë 15-vjeçarin, duke e lënë të shtrirë në tokë në gjendje të rëndë. Policia arrestoi menjëherë autorin e dyshuar, ndërsa mjekët po luftojnë për të stabilizuar të plagosurin.
I mituri ndodhet ende në Spitalin Rajonal të Durrësit, nën kujdes intensiv, ndërsa hetimet vijojnë për të zbardhur plotësisht këtë episod dramatik që ka ngritur alarmin për dhunën mes të miturve dhe pasojat e saj shkatërruese.
