Detaje të reja janë zbardhur nga plagosja me armë zjarri e 27-vjeçarit të identifikuar me emrin Emiljano Paloka, mbrëmjen e djeshme. Ngjarja ka ndodhur në rrethana të paqarta në malin e Kolajve në Velipojë.
I riu ishte në një makinë me dy persona të tjerë, në momentin kur është plagosur. Kanë qenë këta të fundit të cilët e kanë transportuar në spital dhe më pas janë larguar.
Policia po heton për të zbuluar nëse dy të lartpërmendurit kanë gisht në plagosjen e të riut, por nuk ka ende një informacion zyrtar lidhur me këtë detaj. Sakaq, pritet që dëshmia e Palokës të hedhë dritë mbi ngjarjen.
Njoftimi i Policisë:
Shkodër/Informacion paraprak
Rreth orës 21:45, në malin e Kolajve Velipojë, në rrethana ende të paqarta është plagosur me armë zjarri shtetasi E. P., 27 vjeç, banues në fshatin Pulaj-Plazhë, i cili është transportuar për ndihmë mjekësore dhe ndodhet jashtë rrezikut për jetën. Shërbimet e Policisë, me marrjen e njoftimit, shkuan menjëherë në vendin e ngjarjes dhe sëbashku me dy grupe të Forcës Kombëtare të Sigurisë Njësia Shkodër po vijojnë krehjen e zonës. Grupi hetimor në drejtimin e Prokurorisë, vijon punën në vendngjarje për sqarimin e rrethanave të ngjarjes dhe identifikimin e autoreve.
