Drejtori i Policisë së Tiranës, Rebani Jaupaj, ka folur në lidhje me plagosjen me armë zjarri të një 19-vjeçari sot në kryeqytet. Në një prononcim për mediat, Jaupaj tha se i riu ndodhet në spitalin e Traumës dhe është jashtë rrezikut për jetën. Ai shtoi se të dyja palët kanë qenë në një lokal dhe ngjarja ka ndodhur pas një konflikti të çastit. Jaupaj bëri gjithashtu me dije se policia ka një emër për autorin, të cilin do e bëjë me dije në dokumentimin e plotë të ngjarjes.
Ndërkohë, nga mediat bëhet me dije edhe emri i autorit, i cili është Klajdi Kodra nga Laçi.
“Këtu pranë kemi pasur një plagosje me armë zjarri të një 19-vjeçari i cili aktualisht ndodhet në spitalin e Traumës. Është jashtë rrezikut për jetën. Grupi hetimor po punon në vendin e ngjarjes. Ka qenë një konflikt i çastit. Të dyja palët kanë qenë në të njëjtin lokal, fillimisht janë konfliktuar fizikisht. Kanë qenë në tavolinë të veçanta. Një person ka qëlluar me armë zjarri vetëm një herë. Kemi një emër të autorit për të cilin do të bëjmë dokumentimin e plotë të kësaj ngjarje dhe do t’jua bëjmë me dije”, tha Jaupaj.
Ngjarja ndodhi ditën e sotme rreth orës 15:45 në rrugën “Liman Kaba”, ku pas një konflikti të çastit mbeti i plagosur 19-vjeçari Redi Kaçorri. I riu u transportua në spital dhe ndodhet nën kujdesin e mjekëve
