Gjykata e Durrësit ka vendosur masën e sigurisë “arrest me burg” për 56-vjeçarin Shpëtim Osma, i cili akuzohet për plagosjen me armë zjarri të fqinjëve të tij, bashkëshortëve Sami dhe Nadire Disha. Ngjarja ndodhi në fshatin Gosë të Rrogozhinës, ditën e festës së Kurban Bajramit.
Gjatë seancës për vleftësimin dhe caktimin e masës së sigurisë, i dyshuari nuk shfaqi asnjë shenjë pendese për veprimin e kryer. Para gjyqtares Besjana Garxenaj, Osma ka deklaruar se është ndjerë i fyer dhe i sulmuar fizikisht nga çifti Disha. Ai sqaroi se kishte pasur më herët një konflikt verbal me ta për shkak të erës dhe zhurmës që shkaktonin bagëtitë e vendosura në oborrin përballë banesës së tij.
Sipas deklarimeve, shtëpia ku mbahet kasollja e bagëtive është në pronësi të Bujarit, vëllait të Sami Dishës, i cili jeton në Greqi. Banesa përballë është e pabanuar dhe, sipas të dhënave, është përdorur nga çifti Disha për të strehuar bagëtitë, larg shtëpisë së tyre, që ndodhet në të njëjtën rrugicë.
Pas dëgjimit të palëve, trupa gjykuese e konsideroi Osman si një rrezik potencial për shoqërinë dhe për ecurinë e hetimeve, duke lënë në fuqi masën shtrënguese të arrestit me burg.
