Pasditen e djeshme një palgosje ndodhi në zonën e Astirit, ku si pasojë e një konflikti çasti një 20-vjeçar ka qëlluar me armë zjarri në këmbë 45-vjeçarin Spartak Beqaraj dhe më pas është larguar.
Ndërkohë policia ka bërë të mundur identifikimin e autorit duke e shpallur në kërkim atë dhe dy persona të tjerë miq të 20-vjeçarit, mes tyre edhe një vajzë.
20-vjeçari Aleksandër Mehmetaj, është shpallur në kërkim pasi akuzohet se është personi që i zuri pritë Spartak Beqarajt.
Ndërkohë, bashkë me Mehmetajn, është shpallur në kërkim edhe një 22-vjeçar me inicialet E.D dhe një vajzë 19 vjeçe me inicialet E.C. këta dy të fundit, akuzohen se kanë qenë bashkëpunëtorë të Mehmetajt, duke mbajtur nën vëzhgim ‘shënjestrën’.
Kujtojmë se aktualisht 45-vjeçari Spartak Beqaraj ndodhet në spital, jashtë rrezikut për jetën. Ai u plagos pasditen e djeshme në momentin që u afrua pranë hyrjes së pallatit të tij nga Mehmetaj.
Mësohet se e gjithë ngjarja ka filluar prej një zënke përpara dy javësh mes 45-vjeçarit dhe të riut. Beqaraj mësohet se kishte vënë re që 20-vjeçari Mehmetaj konsumonte hashash dhe i kishte tërhequr vëmendjen këtij të fundit duke e kritikuar.
Pas kritikave 20-vjeçari mësohet se e kishte ofenduar Beqarajn dhe ndërkohë ky i fundit ishte përleshur me të duke e kapur prej fyti. Falë ndërhyrjes së fqinjëve ngjarja nuk u përshkallëzua më tej, por mesa duket Mehmetajt nuk i kishte kaluar inati me 45-vjeçarin.
Vetëm dy javë më vonë, pra ditën e djeshme, 20-vjeçari pasi i kishte ruajtur lëvizjet e Spartak Beqarajt, u kthye për të marrë hak duke e qëlluar 45-vjeçarin në këmbë.
Njoftimi i Policisë:
Më datë 20.09.2020, rreth orës 17:45, në Unazë të Re, pranë një lokali, pas një konflikti të çastit, për motive të dobëta, dyshohet se është plagosur me armë zjarri pistoletë në këmbë shtetasi S.B., 45 vjeç, i cili u dërgua në spital dhe ndodhet nën kujdesin e mjekëve jashtë rrezikut për jetën.
Shërbimet e Policisë kanë shkuar menjëherë në vendngjarje, ka rrethuar zonën dhe vijon krehja e saj për kapjen e autorit, i cili menjeherë pas plagosjes është larguar nga vendngjarja .
Grupi hetimor vijon punën për zbardhjen e rrethanave të ngjarjes dhe fiksimin e çdo prove materiale që do çojë në identifikimin dhe kapjen e autorëve.
