Policia e Durrësit ka dalë me një njoftim zyrtar lidhur me ngjarjen e ndodhur gjatë ditës së sotme ku një efektiv u plagos me thikë nga një 38-jeçar. Sipas bluve, qytetari po lëvizte në lagjen nr 1 me thikë në dorë, duke u bërë rrezik për kalimtarët.
Menjëherë, shërbimet e Policisë kanë shkuar në adresën e dhënë kan ndërhyrë për të neutralizuar agresorin. Gjatë ndërhyrjes një nga punonjësit e Policisë është plagosur dhe tashmë ndodhet në spital jashtë rrezikut për jetën.
NJOFTIMI I POLICISË:
Rreth orës 11:00, Policia ka marrë njoftim nga qytetarët, se në lagjen nr. 1, një shtetas po lëvizte në rrugë, me mjet prerës, në dorë, duke u bërë rrezik për kalimtarët.
Menjëherë, shërbimet e Policisë kanë shkuar në adresën e dhënë ku kanë konstatuar shtetasin F. C., duke mbajtur një mjet prerës (thikë), në dorë. Gjatë ndërhyrjes së shërbimeve të Policisë, për neutralizimin e këtij shtetasi, është dëmtuar lehtë në dorë, nga mjeti prerës, punonjësi i Policisë E. C., i cili po merr mjekim në spital dhe është jashtë rrezikut për jetën.
Shërbimet e Policisë e kanë shoqëruar shtetasin F. C., 38 vjeç, në Komisariat, për veprime të mëtejshme. Mjeti prerës është sekuestruar në cilësinë e provës materiale. Grupi hetimor po punon për sqarimin e rrethanave të rastit.
