Policia e Shkodrës ka arritur të zbardhë ngjarjen e mbrëmshme ku mbetën të plagosur Erison Gjeka dhe Ndre Pali.
Uniformat blu kanë zbuluar autorin e ngjarjes dhe kanë shpallur në kërkim 35-vjeçarin Elton Dusha.
Mësohet se 35-vjeçari Dusha i ka qëlluar dy të rinjtë në këmbë pas një sherri banal.
Mbi 35-vjeçarin Elton Dusha rëndojnë akuzat “Plagosja e lehtë me dashje” dhe “Armëmbajtja pa leje.
Njoftimi i Policisë:
Identifikohet dhe shpallet në kërkim autori i dyshuar i kësaj ngjarje. Nga strukturat e DVP Shkodër në bashkëpunim me Prokurorinë e Rrethit Gjyqësor Shkodër, falë reagimit të shpejtë dhe si rezultat i veprimeve të shpejta hetimore në lidhje me ngjarjen e ndodhur mbrëmjen e datës 25.08.2020, u bë e mundur zbardhja e ngjarjes, identifikimi dhe shpallja në kërkim e autorit të dyshuar, shtetasit E. D., 35 vjeç, banues në lagjen Skënderbeg, Shkodër.
Ky shtetas gjatë një konflikti të çastit, ka qëlluar me armë zjarri duke i plagosur në këmbë, shtetasit E. Gj., 24 vjeç, banues në fshatin Bradhaj, Shkodër, dhe N. M., 24 vjeç, banues në Shkodër, të cilët pas mjekimit të marrë në Spitalin Rajonal Shkodër janë larguar për në banesë. Materialet iu referuan Prokurorisë së Rrethit Gjyqësor Shkodër për veprat penale “Plagosja e lehtë me dashje” dhe “Armëmbajtja pa leje.
