Një ngjarje e rëndë me armë zjarri tronditi mbrëmjen e së shtunës zonën e Freskut në Tiranë, ku 28-vjeçari Juglen Abazi u plagos dhe u dërgua vetë në spital për trajtim mjekësor.
Policia e Tiranës njoftoi këtë të hënë se ka arrestuar Andi Gurrën, një nga bashkëpunëtorët e autorit të dyshuar, pas arrestimit ditën e djeshme të bashkëpunëtorit tjetër, Xhonatan Qerimit.
Tani, në kërkim vijon të jetë vetëm autori kryesor, Klejvis Caka, i njohur edhe me nofkën “Lusha”, banues në Tiranë. Ai akuzohet për “vrasje me dashje e mbetur në tentativë” dhe “mbajtje pa leje të armëve dhe municionit”.
Hetimet zbulojnë se Caka dyshohet se qëlloi me armë zjarri në rrugën “Thoma Filipeu”, duke plagosur Abazin. Ndërkaq, të arrestuarit Gurrë dhe Qerimi akuzohen për “përkrahje të autorit të krimit”, pasi dyshohet se e ndihmuan autorin të largohej nga vendngjarja.
Policia vijon punën intensive për kapjen e Klejvis Cakës dhe për dokumentimin e plotë të kësaj ngjarjeje të rëndë.
