Policia e Tiranës ka zbardhur rrethanat e plagosjes me armë zjarri të një 15-vjeçari, ngjarje që ndodhi një ditë më parë në zonën e “Ali Demit”.
Plagosja ndodhi gjatë një konflikti për motive të dobëta brenda një picerie, ku i mituri mbeti i plagosur nga një armë zjarri e tipit atipik.
Në përfundim të veprimeve hetimore të kryera nga specialistët e Komisariatit të Policisë Nr. 1, është identifikuar si autor i dyshuar 21-vjeçari Aldi Neziri, i cili është shpallur në kërkim për veprat penale “Plagosje e rëndë me dashje” dhe “Mbajtje pa leje e armëve dhe municionit”.
Gjithashtu, në kërkim është shpallur edhe administratori i picerisë ku ndodhi ngjarja, Leonardo Mejdani, 24 vjeç, i akuzuar për “Moskallëzim krimi” dhe “Veprime që pengojnë zbardhjen e të vërtetës”.
Policia ka arrestuar edhe tre punonjës të picerisë: Fatjon Beqiri (20 vjeç), Arlind Hoxha (29 vjeç) dhe Klajdi Bala (20 vjeç), të cilët dyshohet se kanë ndërhyrë në vendin e ngjarjes duke pastruar skenën e krimit dhe duke hequr pajisjen DVR të kamerave të sigurisë, për të penguar hetimet.
Ndërkohë, një 15-vjeçare është proceduar penalisht për veprën penale “Veprime që pengojnë zbulimin e të vërtetës”.
Materialet e çështjes i janë referuar Prokurorisë për vijimin e mëtejshëm të procedurave ligjore.
