Një ngjarje e rëndë tronditi Sarandën të hënën, ku një 51-vjeçare mbeti e plagosur me thikë nga bashkëshorti i saj.
Pavarësisht orëve të tëra kërkimesh nga policia e Sarandës dhe forcat e mbërritura nga Vlora, ende nuk është bërë e mundur kapja e autorit të dyshuar, 55-vjeçarit Adriatik Bodini.
Ai dyshohet se ka goditur me thikë në bark bashkëshorten e tij, Mirjana Bodini, e cila aktualisht ndodhet në reanimacion në Spitalin e Vlorës.
Sipas burimeve policore, viktima ende nuk ka dhënë një deklaratë për të sqaruar rrethanat e ngjarjes. Çifti Bodini, prindër të një djali, janë me origjinë nga Nivica, ndërsa Adriatik Bodini punonte në ndërtim dhe merrej me punime në Piqeras.
Banesa e tyre ndodhet në katin e tretë të një pallati shtatëkatësh, dhe dera e ballkonit ishte ende e hapur pas ngjarjes. Gjurmët e gjakut të 51-vjeçares mbeten të dukshme në shkallët e pallatit. Banorët e lagjes shprehën habinë dhe tronditjen e tyre, duke e përshkruar çiftin si të qetë dhe pa probleme të dukshme.
“Adriatiku ishte një njeri punëtor, i sjellshëm dhe i përkushtuar në punën e tij. Nuk e kuptojmë si mund të ndodhte diçka e tillë,” tha një komshi.
Një tjetër banore shtoi: “I njihnim si një familje shumë të mirë dhe të qetë. Nuk e kuptoj si arritën në këtë situatë tragjike.”
