Policia e Tiranës ka vënë në pranga 21-vjeçarin Aldi Neziri, i dyshuar si autori i plagosjes së një 15-vjeçari në një piceri në zonën e Ali Demit.
Neziri akuzohet për “plagosje të rëndë me dashje” dhe “mbajtje pa leje të armëve dhe municioneve luftarake”.
Ngjarja ndodhi pasditen e së dielës, kur i mituri ndodhej ulur në një tavolinë së bashku me kushëririn e tij, administratorin e picerisë Leonardo Mejdani dhe kolegun tjetër, Aldi Neziri.
Sipas hetimeve paraprake, ky i fundit nxori një armë të modifikuar në formën e një stilolapsi dhe qëlloi, duke e plagosur të miturin me një plumb në qafë.
Fatmirësisht, i riu ndodhet jashtë rrezikut për jetën dhe po trajtohet në Spitalin e Traumës.
Ndërkohë, policia është ende në kërkim të administratorit të lokalit, Leonardo Mejdani.
Hetimet zbuluan se pas ngjarjes, të dyshuarit nuk njoftuan autoritetet, por tentuan të fshihnin incidentin, duke hequr edhe pajisjet DVR me pamjet filmike që mund të shërbenin si prova për zbardhjen e rrethanave.
