Një shtetas i huaj është therur me thikë mbrëmjen e sotme në Qendrën e Azilkërkuesve në Vranidoll në Kosovë. Viktima është nisur me urgjencë për në spitalin e Urgjencës Kombëtare në Kosovë. Ky lajm është konfirmuar për mediat vendase edhe nga zëdhënësi i Policisë në rajonin e Prishtinës, Agron Borovci. Borovoci thotë se ngjarja ka ndodhur rreth orës 19:30 ku janë lajmëruar për një plagosje me mjet të mprehtë (thikë) në Qendrën e Azilkërkuesve.
“Rreth orës 19:30 është raportuar për një therrje me thikë të ndodhur në “Vranidoll” respektivisht në Qendrën e Azilkërkuesve. Menjëherë pas marrjes së informacionit policia ka dalë në vendin e ngjarjes dhe nga të dhënat e e para dyshohet për një persona të lënduar nga mjeti i mpreht ( thikë) i cili është transferuar në QKUK për trajtim të metjmë mjekësor”, ka thënë Borovci.
Në lidhje me këtë ngjarje ai ka njoftuar se janë arrestuar dy persona, po ashtu shtetas të huaj që mund të kenë lidhje me ngjarjen.
“Ndërlidhur me rastin, veprimet e shpejta policore kanë rezultuar me arrestimin e dy personave të dyshuar dhe aktualisht është iniciuar një hetim me qëllim sqarimin e rrethanave të rastit. Viktima dhe të dyshuarit janë shtetas të huaj”, ka thënë tutje Borovci.
