Mbrëmjen e sotme një person i plagosur me armë zjarri ka mbërritur në spitalin e Vlorës. Ende janë të paqarta rrethanat, teksa mësohet se i plagosur ka mbetur 36-vjeçari me iniciale D.H.
Gazetari Enrik Mehmeti, ka treguar për “BalkanWeb” detaje të reja nga atentati i ndodhur në qytetin e Vlorës, ku i plagosur ka mbetur 36-vjeçari Diego Hanaj.
Policia është njoftuar nga personeli i spitalit për të plagosurin dhe ka shkuar në spital për kryerjen e veprimeve hetimore. Gazetari Enrik Mehmeti raportoi për “BalkanWeb” se 36-vjeçari është plagosur me pistoletë pas një konflikti me një person tjetër.
Informacion paraprak
Në lagjen “Pavarësia”, para pallatit te tij, dyshohet se është plagosur në dorë, me armë zjarri shtetasi D. H., 36 vjeç, i cili ndodhet jashtë rrezikut për jetën në Spitalin e Vlorës.
Shërbimet e Policisë po krehin zonën për të bëre të mundur kapjen e autorit. Ndërkohe grupi hetimor ndodhet në vendngjarje dhe po punon për sqarimin e rrethanave të ngjarjes.
Sipas gazetarit, Hanaj ka qenë duke ecur në këmbë në momentin që është qëlluar me armë nga persona ende të pa identifikuar.
Më pas, me plagë në duar, ai është drejtuar për një dyqan ushqimor, rreth 18 metra nga vendi që nisi të qëllohet. Aty më pas, Hanaj ka kërkuar ndihmë dhe është nisur drejt spitalit, ku po merr ndihmë mjekësore. 36-vjeçari sipas raportimeve ndodhet jashtë rrezikut për jetën.
Në vendngjarje ndërkohë policia ka gjetur 4 gëzhoja si dhe është vendosur perimetri i sigurisë e po punohet për grumbullimin e sa më shumë provave materiale. Ndërkohë, rruga ku ka ndodhur ngjarja është e bllokuar dhe ndalohet kalimi i makinave.
