: “Partia e Lirisë në gjendje lufte me Erion Veliajn dhe mbështetësit e tij”
Pas tensioneve të krijuara në mbledhjen e sotme të Këshillit Bashkiak të Tiranës, ku u përfshi këshilltari i Partisë së Lirisë (PL), Tedi Blushi, Presidenti i kësaj partie, Ilir Meta, ka reaguar ashpër me një postim në rrjetet sociale.
Meta e cilësoi incidentin si një akt sulmues nga kryebashkiaku Erion Veliaj dhe këshilltari Halit Valteri ndaj Blushit. “Akti sulmues i Prindit 2 Erion Veliaj dhe zarit të tij Halit Valteri ndaj këshilltarit dhe Sekretarit të Përgjithshëm të Partisë së Lirisë, z.Tedi Blushi, do të marrë shumë shpejt përgjigjen e merituar demokratike dhe shqiptare,” shkroi Meta.
Ai deklaroi se nga sot Partia e Lirisë është në gjendje lufte me Veliajn, të cilin e quajti “kryehajdutin e Tiranës” dhe me mbështetësit e tij. Meta akuzoi Veliajn dhe rrethin e tij për korrupsion dhe padrejtësi, duke përmendur rastin e vrasjes së Ardit Gjoklajt.
“Partia e Lirisë është në gjendje lufte me tutorët dhe protektorët e këtij fëlliqësire që vrau Ardit Gjoklajn. Partia e Lirisë do t’ju mësojë të gjithëve se nuk jemi komb eksperimental por Shqiponjash. Nuk ka tutor dhe protektor në botë që e ndalon Drejtësinë tonë!” përfundoi Meta.
Ky reagim vjen pas një dite me tensione të larta në Këshillin Bashkiak të Tiranës, ku Veliaj kishte planifikuar të votoheshin disa nisma të rëndësishme për qytetin, por që u shoqëruan me përplasje fizike dhe akuza të ndërsjellta.
