Një nga mbiemrat më të përfolur ditëve të fundit ka qenë edhe ai i Avdylajve dhe kjo për shkak të përgjimeve të bëra publike në media, mirëpo mesa duket një pjesëtar i këtij grupi ka tentuar që të largohet nga Shqipëria nëpërmjet grupit tjetër kriminal që falsifikonte pasaporta dhe kontrabandonte njerëz drejt Shteteve të Bashkuara, Kanadasë dhe Britanisë së Madhe.
Tashmë detaje të reja janë bërë të njohura nga operacioni “Rruga e Gabuar”, prej nga kanë rënë në pranga 32 pjesëtarë të grupit kriminal. Nga policia dyshohet se gjithë procedura e falsifikimit të dokumenteve dhe transporti drejt destinacionit kushtonte 20 mijë euro, mirëpo ende asgjë nuk është e konfirmuar.
Nuk ishin vetëm qytetarë të thjeshtë ata që kërkonin pasaporta amerikane, por edhe ata me precedent penal, ku këto pasaporta i merrnin për të realizuar veprimtaritë e tyre.
Sipas Ballkanweb, ky grup kriminal ka pajisur me dokumente false edhe një të dyshuar si pjesëtar i grupit të Astrit Avdylit. Pavarësisht përpjekjeve, anëtari i grupit të Avdylajve nuk ka arritur të largohet nga vendi. Madje, vetëm pak ditë më pas është arrestuar.
