Arrestohet në Durrës 37-vjeçari shqiptar, i shpallur në kërkim ndërkombëtar nga shteti italian. Në pranga ka përfunduar i riu, Erlin Mema, i cili pritet që të ekstradohet për llogari të Italisë. Kjo pasi siç bën me dije Policia e Shtetit, 37-vjeçari kërkohet pasi Gjykata e Breshias i ka masën e sigurisë “Arrest me burg”. Kjo pasi i riu, akuzohet se është pjesë e një grupi kriminal që grabiste banesa në Itali.
NJOFTIMI I PLOTË:
“Durrës/Finalizohet operacioni policor i koduar “Catch”, për kapjen e një shtetasi të shpallur në kërkim ndërkombëtar, për llogari të Italisë. Operacioni u zhvillua nga Forca e Posaçme Operacionale e DVP Durrës. Kapet në Durrës dhe arrestohet për t’u ekstraduar në Itali, pjesëtari i një grupi kriminal me veprimtari në fushën e vjedhjes në banesa. Si rezultat i aksioneve intensive të Policisë, të kryera me qëllim kapjen e shtetasve të shpallur në kërkim, si dhe në bazë të informacioneve të siguruara nga inteligjenca policore dhe të shkëmbyera ndërmjet zyrave homologe të Interpolit, mbi vendndodhjen e një shtetasi të shpallur në kërkim ndërkombëtar, për llogari të Italisë, u organizua dhe u finalizua operacioni policor i koduar “Catch”.
Gjatë operacionit, u lokalizua, u kap dhe u arrestua provizorisht, për t’u ekstraduar në Itali, shtetasi i shpallur në kërkim ndërkombëtar E. M., 37 vjeç. Gjykata e Breshias i ka caktuar këtij shtetasi, masën e sigurisë “Arrest me burg”, për veprën penale “Pjesëmarrja në grup kriminal, me qëllim vjedhje banesash”, parashikuar nga Kodi Penal i Italisë. Interpol Tirana dhe Interpol Roma po bashkëpunojnë për ekstradimin e këtij shtetasi, në Itali.”
