Burgu i Drenovës nuk gjen qetësi!
Një i burgosur në burgun e Drenovës ka konsumuar një sasi ilaçesh dhe më pas është dërguar në spitalin e Korçës për të marrë ndihmë mjekësore.
Pas kurimit në spital, dyshohet se ai ka vjedhur nga dhoma e mjekimit një bisturi, mjet i cili i është kapur gjatë kontrollit nga ana e policisë së burgjeve, raporton ABC News.
Shtetasi A.H. është arrestuar për vjedhje, ndërsa ka qenë në paraburgim, por për shkak të thyerjes se sigurisë ai u fut në regjim.
Bëhet e ditur se do të procedohet për nenin 324/a të kodit penal për futjen e sendeve të paligjshme në institucionet e vuajtjes së dënimit.
Theksojmë se vitin e kaluar në burgun e Drenovës kanë humbur një palë gërshërë që përdorin infermierët për nevojat e të burgosurve.
U bë e ditur se në shërbim ka qenë një infermier nga Korça, i cili pretendonte se i kishte lënë gërshërët në infermieri, por kur është bërë inventari ato mungonin.
Dyshohej se i burgosuri i sigurisë të lartë Klement Ibrahimi të jetë ai që i ka marrë gërshërët, gjatë kohës kur po merrte serum në spitalin e burgut. Ajo çka e bënte më alarmante situatën ishte fakti se në këtë burg ndodhej i penduari i drejtësisë Lefter Reçi i cili ka “spiunuar” Emiljano Shullazin dhe Lul Berishën.
