Kryetari i Partisë Demokratike, Lulzim Basha, ka shprehur ngushëllimet për ndarjen nga jeta të aktorit dhe regjisorit të mirënjohur, Pirro Mani. Në një postim në rrjetet sociale, Basha thotë se e sotmja është një ditë e trishtë për teatrin dhe artin shqiptar, si dhe e konsideroi Pirro Manin si një ikonë të teatrit.
Mesazhi i plotë i kreut të PD-së, Lulzim Basha:
“Me hidhërim të thellë mësova lajmin e ndarjes nga jeta e ikonës së teatrit Pirro Mani. E sotmja është një ditë e trishtë për teatrin, një ditë e trishtë për artin shqiptar, një ditë e trishtë për artdashësit. Në këto orë të vështirë për familjen Mani i shpreh ngushëllimet e mia të sinqerta bashkëshortes znj. Pavlina Mani dhe fëmijëve, si dhe kolegëve e miqve të tij në botën e artit. U prehtë në paqe!”, shkroi Basha.
Më herët, edhe lideri i PS-së dhe kryeministri i Shqipërisë, Edi Rama, ngushëlloi familjen e Pirro Manit, duke shkruar: “Lamtumirë usta! Pirro Mani ishte ustai i madh i skenës kombëtare teatrore. Pa të kultura dhe historia e artit skenik shqiptar do të ishin shumë më të varfër. U prehtë në paqe dhe ngushëllime familjes”, shkroi kryeministri Rama. Mani u nda nga jeta në moshën 89-vjeçare në Amerikë.
