Mbërritja e koronavirusit në vendin tonë, ashtu si edhe në shumë shtete të tjera, e ka drejtuar vëmendjen e njerëzve tek mjekët, që janë konsideruar si heronjtë e heshtur të kësaj lufte.
Mjeku infeksionist Pëllumb Pipero është shndërruar tashmë në një figurat më të dashura për shqiptarët, prej daljeve të shpeshta në media ku informon rreth situatës në vendin tonë.
Së fundmi, mjeku ka realizuar një lidhje me Skype me News 24, ku ka thënë se ndonëse numri i rasteve të reja ditën e sotme ra ndjeshëm, kjo javë do jetë e luhatshme, teksa tha se sipas tij javën e ardhshme rastet do bien gradualisht.
Por, sipas mjekut kjo nuk do të thotë se e kemi fituar luftën me COVID-19, sepse epidemia do vijojë ndonëse rastet do ulen, madje se cilësoi këtë si fillimin e një fundi të gjatë.
“Këtë javë numrat e të infektuarve do luhaten, ndërsa javën e ardhshme mendoj se do nisë rënia.Kur flas për kurbë, flasë për rang vendi, jo qyteti. Duhet të kemi parasysh se edhe pse numri po bie, epidemia vazhdon, kështu duhet të jeni të kujdesshëm e të shmangini radhët e gjata dhe kontaktet. Ky është fillimi i një fundi të gjatë. Në fund të qershorit mund të flasim për fitim. Tregoni kujdes dhe dilni vetëm për raste urgjente, jo për qejf.”
Ndërsa, sa i përket Shkodrës, vendi i dytë më i prekur në vendin tonë, Pipero tha se është një rast i veçantë sepse aty ka dy vatra, që janë 2 familje, si edhe qytetarët nuk i kanë respektuar masat e marra nga qeveria.
Shkodra është rast i veçantë atje kemi dy vatra, që janë 2 familje me sa di unë. Po ashtu, Shkodra nuk ka respektuar as masat e ndërmarra nga qeveria, apo rregullat e karantinës. Kjo ka bërë që virusi të përhapet me shpejtësi.
A fitojnë imunitet personat që janë prekur nga koronavirusi?
Mjeku tha se studimet e deritanishme në shumë vende të botës ka treguar se po, por nuk dihet për sa kohë.
Virusi lë imunitet tek personat e prekur. Se sa zgjatë imuniteti mbetet për tu parë, sepse duhet të kalojnë të paktën 6 muaj për ta thënë këtë.Kam dëgjuar disa lajme se virusi mund të transmetohet nga njeriu tek kafshët, por nuk ka ende asgjë provë rreth kësaj. Kështu, do ju kërkoja të mos besonit çdo lajm që lexoni.
Ndërsa, i pyetur rreth gjendjes në spitalin Infektiv, mjeku tha se situata është e stabilizuar dhe se janë shëruar mbi 140 pacientë, duke e konsideruar këtë një shenjë shumë pozitive.
“Gjendja në spital është e stabilizuar. Kam thënë që është dinamike dhe ka pacientë në gjendje të rëndë, por në mëngjes kanë lënë spitalin 8 pacientë dhe jam i sigurtë që dhe shumë të tjerë do shërohen. Kemi një mesatare shumë të mirë deri tani sepse janë shëruar rreth 140 pacientë dhe ky është tregues shumë i mirë.”
