Kompania e ilaçeve Pfizer tha të premten se pilula e saj eksperimentale e krijuar për të luftuar koronavirusin, ul rrezikun e shtrimeve në spital dhe të vdekjeve, për pacientët me rrezik të lartë.
Kompania shpreson se mund ta kombinojë pilulën me një ilaç më të vjetër antiviral të quajtur ritonavir, në mënyrë që njerëzit ta marrin atë përpara se të sëmuren aq keq sa të shtrohen në spital.
Një analizë e përkohshme tregoi një ulje prej 89% të rrezikut të shtrimit në spital ose të vdekjes nga Covid-19 nëse pacientët e marrin atë mjaftueshëm shpejt, tha kompania.
Kompania e ka testuar ilaçin tek të rriturit me Covid-19 të cilët konsiderohen me rrezik të lartë.
Pilula, e njohur me emrin eksperimental PF-07321332, është krijuar për të ndaluar shumimin e virusit. Kombinimi i saj me ilaçin ritonavir rrit efektin në trup, tha kompania.
Pfizer tha se vetëm 0.8% e pacientëve që morën kombinimin e këtyre ilaçeve u shtruan në spital brenda katër javësh, ose tre nga 389 pacientë, në krahasim me 7% të pacientëve që morën trajtimin placebo, ose 27 nga 385 veta. Dhe shtatë persona që morën trajtimin placebo vdiqën, tha Pfizer. Askush që mori trajtimin nuk vdiq brenda një muaji.
“Reduktime të ngjashme në shtrimet në spital ose vdekjet e lidhura me COVID-19, u vunë re tek pacientët e trajtuar brenda pesë ditëve që nga fillimi i simptomave; 1% e pacientëve që morën ilaçin PF-07321332 me ritonavir, u shtruan në spital, krahasuar me 6.7% të pacientëve që morën trajtim placebo,” tha kompania.
Kompania tha se 19% e pacientëve të cilëve iu dha ilaçi, patën efekte anësore, krahasuar me 21% që morën trajtimin placebo, por kompania nuk pranoi të zbulonte se cilat ishin ato efekte anësore.
“Këto të dhëna tregojnë se, nëse miratohet nga autoritetet rregullatore, ilaçi ynë ka potencialin të shpëtojë jetën e pacientëve, të zvogëlojë ashpërsinë e infeksioneve COVID-19 dhe të eliminojë deri në nëntë nga dhjetë shtrime në spital,” tha Albert Bourla, kryetar i Pfizer, në një deklaratë.
Aktualisht, Remdesivir, i shitur nga marka Veklury, është i vetmi ilaç antiviral i miratuar nga FDA-ja për trajtimin e Covid-19.
Njerëzit gjithashtu mund të trajtohen me antitrupa monoklonale, të cilat injektohen dhe nxisin sistemin imunitar për të luftuar infeksionim. Ato nuk janë aq të lehta për t’u marrë sa një pilulë dhe duhet të administrohen nga një profesionist i trajnuar.
Merck po kërkon autorizimin e përdorimit urgjent nga FDA-ja për ilaçin Molnupiravir, një kapsulë antivirale që njerëzit mund ta marrin në shtëpi. Provat kanë treguar se ai zvogëlon rrezikun e shtrimit në spital ose të vdekjes, me rreth 50%. Të enjten, rregullatorët e ilaçeve në Mbretërinë e Bashkuar e autorizuan Molnupiravirin, me emrin e markës Lagevrio.
Burime nga: monitor.al
