Bota e futbollit është tronditur nga një lajm i rëndë. Enzo, djali 15-vjeçar i ish-portierit të Romës dhe Lecce-s, Julio Sergio, ka ndërruar jetë pas një beteje pesëvjeçare me kancerin.
Vetëm pak orë para ndarjes nga jeta, Julio Sergio kishte ndarë një mesazh të dhimbshëm nga spitali përmes rrjeteve sociale, ku shkruante: “Situata është e pakthyeshme. Enzo është në koma të induktuar, i qetësuar dhe me oksigjen sipas nevojës. Por gjëja më e rëndësishme është se ai është në paqe, i rrethuar nga ne të gjithë dhe pa dhimbje.”
Enzo kishte lindur në Romë, gjatë kohës kur Sergio ishte pjesë e ekipit verdhekuq (2006–2013). Në vitet e fundit, ai u kthye në një simbol force dhe shprese, sidomos në Brazil, ku u zhvendos familja pas përfundimit të karrierës së të atit në Itali.
Pas një operacioni të suksesshëm në vitin 2022, Enzo mori pjesë në fushata ndërgjegjësuese për luftën kundër kancerit, duke fituar mbështetjen e figurave të mëdha të futbollit si Gianluigi Buffon, Francesco Totti dhe Cristiano Ronaldo.
Në një moment tepër emocional, Sergio ishte filmuar duke rruar kokën në shenjë solidariteti me të birin, përpara një raundi të ri kimioterapie.
Gjatë gjithë kësaj periudhe të vështirë, Roma, tifozët e saj dhe komuniteti sportiv në përgjithësi i qëndruan pranë Enzos me pankarta, mesazhe dhe duartrokitje që e shoqëronin në çdo hap të betejës së tij.
Humbja e Enzos është një goditje e madhe për familjen Sergio dhe për të gjithë ata që e njohën për buzëqeshjen, guximin dhe forcën e tij të jashtëzakonshme. Ai u largua nga kjo botë, por la pas një kujtim të paharruar dhe një trashëgimi shprese dhe dashurie.
