Ditën e sotme Liga Profesioniste e Futbollit zhvilloi takimin e radhës në lidhje me bojkotin e Superiores.
Ky bojkot vjen pasi qeveria dhe ministria e financave ende nuk ka plotësuar kërkesat e klubeve për vijimin e sezonit të ri sportiv.
Por edhe në takimin e sotëm Liga nuk ka hequr dorë nga vendimi i marrë për vijimin e bojkotit teksa është marrë edhe një vendim tjetër, të cilat i shpjegon Edvin Libohova, presidenti i Ligës.
“Liga unanimisht vendosi që bojkoti të vazhdojë derisa qeveria të plotësojë kërkesat. Pika e dytë ishte se duke parë mënyrën se si është trajtuar emisioni sportiv në RTSH, që nuk është koherent dhe mbështetës për futbollin, Liga vendosi që të mos përsërisë me ta kontratën e bashkëpunimit për ‘highlights’ në sezonin që do të vijë. Këto ishin dy vendimet e marra sot.
Sigurisht nëse do të ketë tym të bardhë në takimin e nesërm, qëndrimi do të ndryshojë. Mirëpresim që të zgjidhen problematikat dhe kërkesat tona. Në momentin që ato zgjidhen Liga është e gatshme të nisë futbollin dhe rifillojë garën.
Bisedimet kanë nisur, nuk ka pasur vendimmarrje. Kemi një takim tjetër nesër, shpresoj që përfaqësuesit e Ministrisë së Financave dhe Parlamentit të vijnë me një propozim të pëlqyeshëm nga Liga. Ndryshe vazhdojmë me këtë situatë.
Përçarja e presidentëve vjen pasi 10 prej tyre duan që të mos fillojë dhe asnjë nuk do që të fillojë”, deklaroi Edvin Libohova në prononcimin e dhënë për mediat.
Sipas asaj që u vendos në takimin e javës së shkuar, ministria e Financës pritet të paraqesë propozimet e saj të martën. Përmbajtja e tyre mund të sjellë edhe ndryshime në qëndrimin e Ligës Profesioniste.
