Koalicioni qeverisës në Holandë u rrëzua zyrtarisht të martën, pas vendimit të Geert Wilders, liderit të partisë së ekstremit të djathtë PVV, për të tërhequr partinë e tij nga qeveria për shkak të mosmarrëveshjeve të thella mbi politikat e migracionit.
Pas bisedimeve të shkurtra dhe të tensionuara mes katër partive në koalicion, Wilders njoftoi se i kishte komunikuar kryeministrit Dick Schoof largimin e ministrave të PVV-së, duke theksuar se nuk mund të mbante më përgjegjësi për vendimet e kabinetit qeveritar.
“Ne hynë në qeveri për të zbatuar një politikë të ashpër migracioni, jo për të shkatërruar Holandën,” deklaroi ai, duke shtuar se partnerët e koalicionit refuzuan të mbështesin idetë e tij për ndalimin e azilit.
Lideri i PVV-së, që është partia më e madhe në parlament pas zgjedhjeve të nëntorit 2023, kishte paralajmëruar që do të largohej nga koalicioni nëse nuk miratohej plani i tij dhjetëpikësh për kufizimin e migracionit, që përfshinte masa si mbyllja e kufijve për azilkërkuesit, ndalimi i bashkimit familjar për refugjatët, mbyllja e qendrave pritëse dhe dëbimi i shtetasve me nënshtetësi të dyfishtë të dënuar për krime.
Megjithatë, ekspertë të shumtë e konsideruan këtë plan të pazbatueshëm dhe në kundërshtim me ligjin ndërkombëtar dhe kushtetutën e vendit. Disa analistë besojnë se Wilders përdori këtë plan për të shkaktuar rënien e qeverisë dhe për të nxitur zgjedhje të parakohshme.
Ky zhvillim e zhyt Holandën në një periudhë pasigurie politike, teksa vendi përgatitet për një samit të rëndësishëm të NATO-s.
