Teksa mëngjesin e ditës së sotme u raportua për një kontroll të Policisë së Shtetit në kampin e Muhaxhedinëve në Manëz të Durrësit, tashmë situata paraqitet më e rënduar. Bëhet me dije se ditën e sotme si pasojë e përplasjes midis opozitës iraniane dhe policisë një person ka mbetur viktimë ndërkohë që raportohet për disa të plagosur. Ky fakt konfirmohet dhe nga zëdhënësi i MEK, i cili pohon viktimë ka ngelur një banor i kampit ASHRAF.
REAGIMI I POLICISË SOT
Në zbatim të vendimit të Gjykatës së Posaçme kundër Korrupsionit dhe Krimit të Organizuar dhe të urdhrit të ekzekutimit të Prokurorisë pranë kësaj Gjykate, për kontrollin e të gjitha ambienteve dhe zyrave ku banojnë për qëllime humanitare, Policia e Shtetit, në kuadër të një plani operacional, ka filluar kontrollin e të gjitha ambienteve dhe zyrave në kampin MEK, në Manëz, Durrës.
Në zbatim të urdhër-kontrolleve të nxjerra nga Gjykata, Policia e Shtetit ka marrë masa për zbatimin e tyre, me planin e kontrollit të ambienteve në territorin e kampit MEK, duke zbatuar me rigorozitet etikën dhe komunikimin e duke respektuar të drejtat dhe liritë themelore të të gjithë qytetarëve dhe komunitetit që banon në këtë kamp. Grupet e kontrollit të Policisë po vijojnë kontrollet në territorin e kampit MEK dhe në ambientet e brendshme të tij. Në përfundim të kontrolleve do të ketë njoftim më të detajuar.
