Fryma e Re Demokratike, me anë të një letre zyrtare, i është drejtuar sot ambasadorëve të huaj, nga Yuri Kim tek Luigi Soreca, duke i cilësuar veprimet dhe vendimet e marra nga bashkia si goditje politike dhe në kundërshti me ligjin.
Kjo letër iu dërgua edhe kreut të Bashkisë, ErionVeliaj, e kreut të KQZ , Ilirjan Celibashi. Kujtojmë se para disa ditësh, në godinën ku ndodhen zyrat e FRD, Presidenti Ilir Meta u konfrontua fizikisht me policët bashkiakë. Incidenti u shkaktua pasi anëtarët e kësaj partie, nuk pranonin të lironin zyrat më kërkesë të bashkisë Tiranë.
Pjesë nga letra:
Partia FRD duke mos qenë dakord me të gjitha veprimet arbitrare të bëra në kundërshtim me nenin nr.22 për partitë politike, ku shprehet se:
“Partite parlamentare pajisen me ndërtesë për selinë e tyre qendrore dhe zyra vendore. Këtë të drejtë e ka edhe partia politike, mesatarja e votave të së cilës në tri zgjedhjet e fundit parlamentare ka qenë mbi 1 për qind në shkallë vendi.
Nëse partia politike është pajisur me ndërtesë me kontratë huapërdorjeje sipas këtij ligji, por nuk plotëson kushtet e parashikuara në shkronjën “b” të këtij neni, atëherë ka të drejtën e lidhjes së kontratës së qirasë për ndërtesën, për ta përdorur vetëm për selinë apo zyrat e saj vendore.
Pika 2 e nenit 22/1 thotë: Kontrata e huapërdorjes ose pagimi i qirasë, sipas këtij neni, për partitë politike zgjat për aq kohë sa partia politike plotëson kushtet e parashikuara në shkonjën “b” të nenit 22.”, duke theksuar se kjo është arsyeja përse i janë drejtuar Gjykatës Administrative të Shkallës së Parë në Tiranë.
