Një ngjarje e rëndë ka ndodhur pranë zonës së “Ish-Fushës së Aviacionit”, ku një 27-vjeçar ka përplasur me automjetin e tij një efektiv policie.
Mësohet se 27-vjeçari i identifikuar si Klevis Balloku, pasi është ndaluar në një nga pikat e kontrollit të ngritura nga policia në kuadër të Planit të Masave, kundërshtoi efektivin e policisë dhe më pas e ka përplasur me makinë.
Forcat “Shqiponja” kishin ngritur postbllok në këtë zonë, dhe i kanë bërë shenjë të ndalojë një 27-vjeçari i cili po drejtonte një mjet tip BMW.
Ai kundërshtoi policin dhe e përplasi atë me makinë, e më pas u largua me shpejtësi. Mirëpo aventura e tij e “çmendur” ka zgjatur vetëm pak pasi “Shqiponjat” i janë vënë pas dhe e kanë arrestuar.
Tiranë
Kundërshtoi me dhunë punonjësin e Policisë, e goditi atë me mjetin që e drejtonte pa leje drejtimi dhe më pas u largua, por u kap dhe prangos pas disa minutash ndjekjeje nga forca e posaçme “Shqiponjat”.
Në pikën e kontrollit të ngritur nga ana e “Shqiponjave” dhe “Shigjetave”, në vendin e quajtur “Ish-Fusha e Aviacionit” i është bërë shenjë ndalimi mjetit tip “BMW”, drejtuesi i të cilit nuk i është bindur urdhrit të punonjësit të Policisë dhe është larguar me shpejtësi, duke goditur me mjet punonjësin e Policisë, i cili ka marrë dëmtime të lehta dhe ndodhet jashtë rrezikut për jetën.
Pas disa minuta ndjekjeje, “Shqiponjat” kanë kapur dhe prangosur shtetasin A. G., 27 vjeç, banues në Tiranë. Ky shtetas është shoqëruar në Komisariatin e Policisë Nr. 2 dhe nga verifikimi i kryer ka rezultuar se drejtonte mjetin pa lejen përkatëse.
Në përfundim të veprimeve, specialistët për Hetimin e Krimit në Komisariatin e Policisë Nr. 2 bënë arrestimin në flagrancë të shtetasit A. G., për veprat penale “Mosbindje e punonjësit të policisë”, “Kundërshtim i punonjësit të policisë me dhunë” dhe “Drejtim mjeti në mënyrë të parregullt”dhe materialet procedurale iu dërguan Prokurorisë pranë Gjykatës së Shkallës së Parë të Rrethit Gjyqësor Tiranë, për veprime të mëtejshme.
