Drejtuesi i makinës “Audi Q8”, i përfshirë në përplasjen me tre automjete të tjera në Tiranë pasditen e së mërkurës, dyshohet të jetë 26-vjeçari Joni Sadikaj.
Ai, ashtu si edhe Skerdi Sina, ishte shpallur në kërkim që nga janari për një ngjarje të mistershme në zonën e Astirit, ku një vajzë 21-vjeçare u mbyll në një apartament me pesë djem, pasi kishin konsumuar gjatë gjithë natës lëndë narkotike dhe alkool.
Sadikaj dyshohet se në atë periudhë nuk kishte shumë ditë që ishte njohur me vajzën në një nga lokalet më të njohura të Astirit, ku ajo punonte.
Pas ndjekjes nga policia, ai arriti t’i shpëtonte duke u larguar me vrap dhe deri tani nuk është kapur.
Policia bëri të ditur se e ka identifikuar dhe shpallur në kërkim. Ndërkohë, Skerdi Sina u arrestua ditën e djeshme. Të dy personat dyshohen të jenë miq apo kushërinj me Aleksandër Sadikajn, i vrarë në qershor të vitit 2022 në një atentat me bombë të telekomanduar në afërsi të TEG-ut në Tiranë.
Aleksandri udhëtonte atëherë me makinën e tij luksoze drejt Memaliajt, ku kishte edhe një biznes agro-ferme.
Çfarë ndodhi dje në zonën e ish-Bllokut në Tiranë?
Ngjarja ndodhi më 2 korrik në zonën e ish-Bllokut, ku automjeti “Audi Q8” i dyshuar për transport armësh u ndoq nga policia në zonën e “Vasil Shantos” dhe më pas u përplas me tre makina të tjera pranë Partisë së Lirisë.
Pas ndalimit, u sekuestrua një armë zjarri dhe u shoqërua pasagjeri, i identifikuar si Skerdi Sina, i cili po ashtu ishte në kërkim për ngjarjen e 9 janarit në Astir.
Sipas burimeve policore, në makinën e Skerdit u gjet një krëhër arme tip Glock me fishekë dhe një patentë false me emrin Almo Aliaj, që dyshohet të jetë falsifikuar.
Në momentin që u largua në këmbë, Sina hodhi armën, e cila më pas u gjet nga policia. Në makinë, gjatë kontrollit, u gjet një sasi e vogël kanabisi dhe disa telefona celularë, të cilat po analizohen nga hetuesit.
Cila është ngjarja që tronditi Astirin në janar 2025?
Pesë persona dyshohet se mbajtën të mbyllur në apartament 21-vjeçaren Sajma Qordja. Personat që u shpallën në kërkim në atë kohë ishin: Skerdi Sina, Ogert Alia, Arnold Jaho, Anduel Alia dhe Joni Sadikaj. Ky i fundit ishte i dashuri i të resë.
