Ditën e sotme Ministri i Mbrojtjes Niko Peleshi raportoi mbi gjendjen në vend pas përfundimit të reshjeve të shiut. Në komunikimin me “Faxweb”, Peleshi raportoi se situata më e vështirë mbetet në Vlorë dhe Fier për shkak të daljes nga shtrati të lumit Vjosa ditën e djeshme.
“Zona më problematike janë në qarqet Fier dhe Vlorë, ndërkohë nga veriu në jug ka pasur reshje bore në zonat malore. Nuk janë bllokuar asnjë moment rrugët nacionale. Mbrëmë ka pasur tërheqje të shpejtë të ujërave sepse kanë funksionuar kanalet kulluese, nuk ka pasur reshje shtesë dhe në këtë moment që flasim lumi Vjosa thuajse është tërhequr në shtratin e saj. Patjetër që ka pasur dëme, por është shmangur e keqja, sepse dy argjinaturat kryesore kanë shpëtuar mijëra hektarë toke nga përmbytja. Vjosa është lumi i fundit i egër në Europë ndaj janë krijuar këto probleme. Tani është kthyer në atraksion, qoftë në agroturizëm, por dhe në mjedis”, bëri me dije ministri Peleshi.
Ai theksoi se po shikohet mundësia e ndërtimit të një sistemi mbrojtjeje nga përmbytjet dhe një ure poshtë autostradës. Më tej, Peleshi theksoi duhet të nisë këtë vit ndërtimi i kësaj ure në mënyrë që sezonin e ardhshëm dimëror të ketë më pak probleme me përmbytjet. Për sa i përket motit, ai shtoi se nuk priten reshje këtë javë.
“Ne duhet të ndërtojmë një sistem alternativ mbrojtjeje, ura përgjatë Vjosës nën autostradë. Kjo urë vështirëson rrjedhjen e ujit, dhe nëse fillojmë këtë vit sic e kemi folur me kryeministrin përgatitjen, sezonin tjetër do kemi shumë më pak probleme. Nuk presim reshje këtë javë, dhe nuk presim as përmbytje. 75 trupa janë në terren duke ndihmuar banorët të evakuohen”, u shpreh ministri i Mbrojtjes Niko Peleshi.
