Partia Demokratike, ka paralajmëruar kallëzim penal për ministrin e Brendshëm Sandër Lleshaj, pas zbulimit të skandalit të zhvendosjes së adresave të zgjedhësve dhe të qendrave të votimit.
Auditi i Komisionit Qëndror të Zgjedhjeve(KQZ), me anë të një raporti të publikuar një muaj përpara zgjedhjeve lokale të 30 qershorit, ka evidentuar faktin se nga zhvendosja arbitrare e adresave u prekën rreth 10% e totalit të votuesve, duke e cilësuar këtë veprim si manipulim të të dhënave të zgjedhësit dhe shkelje flagrante të ligjit.
Por bazuar edhe në raportet e mëparshme, fenomeni duket se ka ekzistuar edhe më parë, por duket se është agravuar sidomos në zgjedhjet e vitit 2019.
Ndërkohë që sipas të gjithave gjasave, edhe në zgjedhjet e vitit 2021, do të përsëritet e njëjta skemë.
Një investigim i nisur nga Ora News për listat zgjedhore, mesa duket ka risjellë në opinionin publik dhe në skenën politike, problemet të cilat ishin bërë të dukshme në zgjedhjet e vitit 2017 dhe ato të vitit 2019.
Pas auditit në Drejtorinë e Gjendjes Civile të bërë nga KQZ vetëm një muaj përpara zgjedhjeve të qershorit të 2019-tës, konstatohej se në lista ishin zhvendosur 350 mijë emra, ose në total rreth 10% e votuesve.
Ndërkohë ish-deputeti i PD-së, Enkelejd Alibeaj, paralajmëroi kallëzim penal për ministrin e Brendshëm Sandër Lleshaj, sidhe drejtorin e Gjendjes Civile Bledar Doracaj.
“Kjo është një shkelje e hapur e ligjit për gjendjen civile, është shkelje e hapur e Kushtetutës dhe e të drejtës për të votuar. Përgjegjës direkt për veprime konkrete janë ministri i Brendshëm, Sandër Lleshaj, drejtori i Përgjithshëm i Gjendjes Civile, Bledar Doracaj dhe çdo nëpunës që ata kanë urdhëruar të shkelin ligjin dhe të përfshihen në këtë operacion manipulimi.
Partia Demokratike, do të paraqesë kallëzim penal, për të gjithë zyrtarët e përfshirë në këtë skemë manipulimi masiv, me zhvendosjen e gjendjes civile, duke filluar që nga ministri Lleshaj, drejtori i Përgjithshëm i Gjendjes Civile, drejtues të pushtetit vendor e me radhë”, ka thnë Alibeaj.
Sakaq në kundër përgjigjen e tij ministri i Brendshëm Lleshaj, e quajti deklaratën e PD-së si një presion për të trembur atë.
Lleshaj dha gjithashtu një përgjigje të pakuptimtë duke u shprehur se “Asnjë ndryshim nuk po ndodh, nuk do të ndodhë dhe nuk mund të ndodhë me qendrat e votimit”.
Me anë të makinacioneve të ndryshme si rasti i manipulimit dhe ndryshimit të adresës së listave të zgjedhësve, e cila sjell sorollatje dhe lodhje shtesë në ditën e votimeve, bën që masa elektorale të dekurajohet për të votuar.
“Ngatërrimi diabolik i procesit të përditësimit apo saktësimit të adresave të qytetarëve, që kryhet në zbatim të ligjit, nuk ka asnjë lidhje me qendrat e votimit të tyre, të cilat nuk ndryshojnë për zgjedhjet e ardhshme parlamentare”, ka thënë Lleshaj.
Gjithsesi dhe ky pretendim i ministrit Lleshaj nuk qëndron se me ndryshimin e adresës, ligji përcakton qartë se ndryshon dhe qendra e votimit.
Gjetjet e auditit
Ky fenomeni ishte disi i hershwm dhe daton që në vitin 2003 me përballjen e Edi Ramës në Tiranë.
Listat e hartuara asokohe nga KQZ, që kontrollohej nga e majta, bënë zhvendosjen e zgjedhësve nga një anë e qytetit në tjetrin. Dikush që kishte votuar në Kinostudio, i duhej të shkonte në Kombinat apo dikush që kish votuar te Stacioni i Trenit, tashmë i dilte emri në Tiranë të Re.
Në zgjedhjet e mëvonshme ky fenomen u reduktua dhe zhvendosja e adresave nuk ishte më problem por sidoqoftë probleme me listat ka pasur gjithmonë, siç ishin emrat e dubluar.
Megjithatë, situata duket se është rikthyer sërish sidomos në zgjedhjet e vitit 2017, dhe ato të vitit 2019.
Një raport i auditit të KQZ, i publikuar në maj të 2019 evidentonte faktin se 350 mijë zgjedhës ose 10 për qind e numrit total të votuesve ishin zhvendosur nga adresat e tyre.
Një problem tjetër, sipas KQZ ka qenë dhe regjistrimi i banorëve të cilët nuk kanë pasur një kod identifikimi të banesës.
Për një periudhë dymujore, janë regjistruar mbi 47 mijë banesa në të gjithë vendin, por hartuesi i raportit të auditit shprehet se procesi ka qenë kaotik, dhe në shumë raste mungonin fare hartat e vendbanimit.
Mospasja e një harte, e bën të pamundur identifikimin e banesës së zgjedhësit, pasi jo në pak raste sipas auditit të KQZ kanë ndodhur çudira.
Për shembull, në Korçë 1051 zgjedhës rezultonin banorë në ambientet e Fakultetit të Shkencave, ndërsa 491 të tjerë banorë të lulishtes së qytetit.
Në Durrës 992 persona banonin në një shtëpi rreth dy dhoma e kuzhinë, ndërsa në Elbasan 441 persona flinin në shkallët e një pallati, e kështu me radhë.
Qëllimi
Auditi i ka përfunduar gjetjet e tij në maj, pra një muaj para zgjedhjeve të përgjithshme. Por me sa duket, bojkoti i opozitës mbuloi dhe skandalin e adresave në atë kohë, i cili po shfaqet në zgjedhjet e këtij viti. Por tashmë jemi vetëm 7 muaj para zgjedhjeve dhe ende nuk është ngritur KQZ, ndërsa në një mënyrë të paprecedentë po tentohet të përmbyset sistemi zgjedhor.
Përshtati: GazetaReforma.com
