Një ngjarje e rëndë ka ndodhur këtë mëngjes në Egnatia Odos në Greqi. Një automjet i cili po transportonte emigrantë të paligjshëm, është aksidentuar duke pasur pasoja tragjike.
Automjeti është evidentuar fillimisht nga policia e cila i ka bërë me shenjë të ndalonte.
Por në këtë moment shoferi i automjetit i cili thuhet se ishte me origjinë moldave ka shtuar shpejtësinë për ti shpëtuar policisë.
Ky ka qenë edhe momenti tragjik, pasi duke tentuar t’i largohet policisë, drejtuesi i automjetit në momentit kur ka synuar të dalë nga rruga Egnatia është përplasur me anësoret në rrugë dhe është përmbysur.
Policia dhe ekipet e shpëtimit që mbërritën në vendngjarje nxorën nga rrënojat 7 të vdekur, 6 të plagosur rëndë të cilët u dërguan në spitalin e Komotinit , ndërsa 2 të tjerë të cilët ishin të plagosur lehtë u dërguan në spitalin e Ksantisë.
Çështja e transportimit të emigrantëve të paligjshmë është një aspekt që jo vetëm Greqia por edhe vende të tjera duan që ta reduktojnë.
Kujtojmë që Shqipëria ka arritur një marrëveshje për të pasur një mision të përbashkët për të parandaluar fluksin e emigrantëve dhe trafiqeve të drogës apo mallrave të paligjshëm në kufi.
Palët kanë rënë dakord për të pasur një qendër të përbashkët ku do të punojnë së bashku shqiptarë dhe grekë, ndërsa qendra do të vendoset në kufirin territorial të Greqisë.
