Edhe pas gjithë bujës së bërë për prishjen e banesave pranë shkollës “Petro Nini”, përmbarimi nuk është dorëzuar ende. Të katër familjeve që jetojnë në ndërtesë i ka mbërritur një letër në të cilën njoftohen se ndërtesa do të prishet duke i dhënë edhe datën e orën.
Pra datë 25 mars në orën 10:00 do të jetë edhe momenti i dytë i përballjes së përmbarimit me familjarët, i cili sipas shenjave nuk ka për të qenë i paqtë.
Një nga familjarët, efektivja e policisë Blerta Dervishi, e cila u pezullua pasi protestoi për të mbrojtur pronën thotë se ndaj tyre po bëhet padrejtësi. Ajo ka thënë se do ta mbrojë pronën me çdo formë.
“Shtëpia ime do të shembet bashkë me mua brenda! Kjo ndërtesë do të ndërtohet vetëm mbi kockat e mia dhe mbi gjakun tim”, thotë Blerta.
Një vendim gjykate i formës së prerë për shembjen e ndërtesës solli përplasje, dy ditë më parë, mes banorëve dhe përmbaruesve. Godina, është ndërtuar mbi një truall që me vendim gjykate i ka kaluar pronarit.
