Tre fëmijë në Indonezi vdiqën nga hepatiti akut në prill, njoftoi të hënën ministria e shëndetësisë e vendit. Euronews shkruan se lajmi e çon numrin e vdekjeve nga shpërthimi i pashpjegueshëm i inflamacionit të mëlçisë tek fëmijët në të paktën katër, pasi një tjetër vdekje u konfirmua nga zyrtarët evropianë të shëndetësisë javën e kaluar.
Fëmijët, të cilët u shtruan në spitalin e Xhakartës, shfaqën simptoma duke përfshirë të përziera, ethe, të vjella, verdhëz, diarre, konvulsione dhe humbje të vetëdijes, tha ministria indoneziane e shëndetësisë në një deklaratë. Singapori konfirmoi rastin e parë të hepatitit akut në një foshnjë 10 muajshe më 1 maj , ndërsa ministria e shëndetësisë e Japonisë tha se besonte se kishte identifikuar një rast të mundshëm më 26 prill.
Hepatiti i rëndë, ose inflamacioni i mëlçisë, është i rrallë tek fëmijët e vegjël. Përhapja aktuale ka çuar në të paktën 17 transplante të mëlçisë në pacientë nën 16 vjeç dhe një vdekje, sipas Organizatës Botërore të Shëndetësisë (OBSH). Tani ka pothuajse 200 raste të hepatitit të rëndë të pashpjegueshëm që prekin fëmijët në mbarë botën, tha më 26 prill drejtori i Qendrës Evropiane për Parandalimin dhe Kontrollin e Sëmundjeve (ECDC), Dr Andrea Ammon.
Britania është vendi më i prekur, me 111 raste në numërimin e fundit. Rreth 55 raste “të mundshme ose të konfirmuara” janë identifikuar në Bashkimin Evropian dhe Zonën Ekonomike Evropiane, tha ECDC. Rastet janë konfirmuar edhe në Shtetet e Bashkuara dhe Izrael.
Përhapja e hepatitit: Ku është zbuluar lloji misterioz që ka vrarë të paktën një fëmijë?
“Hetimet janë duke vazhduar në të gjitha vendet që raportojnë raste, por aktualisht shkaku i saktë i këtij hepatiti mbetet ende i panjohur,” tha Ammon në një konferencë për shtyp në Stokholm.
Ajo shtoi se aktualisht nuk dihet asnjë lidhje mes rasteve, apo ndonjë lidhje me udhëtimin. ECDC nuk pranoi të konfirmojë se në cilin vend kishte ndodhur vdekja e parë e konfirmuar, duke thënë se informacioni ishte konfidencial. Agjencia e Sigurisë Shëndetësore në Mbretërinë e Bashkuar (UKHSA) ka thënë se në Britani nuk është regjistruar asnjë vdekje e fëmijëve nga hepatiti.
