Ministria e Shëndetësisë ka pezulluar koncesionin e Check Up për një afat të pacaktuar, për shkak të situatës së krijuar nga COVID-19.
Kujtojmë se koncesioni i Check Up parashikon kontrollin e shëndetit bazë për moshat nga 40 në 65 vjeç dhe ka nisur punë në shkurt të vitit 2015 me një afat kohor prej 10 vitesh.
Koncesioni është marrë përsipër të kryhet nga privati në formën e Partneritetit Publik Privat dhe më pas do paguhet nga shteti.
Në rang botëror deri tani janë shënuar 6,717 viktima dhe janë regjistruar 175,871 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
