Prej disa ditësh në Tiranë transporti urban po operon me gjysmë kapaciteti.
Sipas Unionit të Transportit Publik vendimi për përgjysmimin e urbanëve në Tiranë vjen “si shkak i mos-marrjes së masave nga ana e qeverisë për të kompensuar humbjet që sektori i transportit publik kishte pësuar gjatë pandemisë. Në deklaratën e tyre shtojnë se sektori ka shkuar deri në kapitullimin ekomomik”.
Ndërkohë qytetarët të pyetur nga “Fax Web” shprehen shumë të shqetësuar mbi situatën e krijuar dhe bëjnë thirrje të merren masa sa më shpejt.
Ata shprehen të revoltuar mbi vonesat e urbanëve, ku sipas një studenteje kjo bëhet shkak edhe për mungesat që marrin në fakultet.
Gjithashtu qytetarët i frikësohen idesë së mund të ketë rritje të biletës dhe abonesë.
“Kur flitet për përhapjen e Covid-19, dritaret mbyllur, njerëzit të ngjeshur dhe nuk nxirrja dot as lekët e biletës. Imagjino të kesh një urgjencë personale, është tmerr! Do të ngrihet dhe cmimi i biletës dhe u bëj thirrje të gjithëve të marrin masa”-tha një qytetare.
“Kam gjysëm ore këtu, udhëtoj me të Sharrës dhe të Ali Demit, mezzi hyp tani dhe autobuzi plot. E kam blerë 16 mijë lekë abonenë, kanë thënë do shkojë në 20. Rrezikoj humbjen e punës për shkak të vonesës, ne nuk jemi zyrtarë të dalim me makina, autobusin kemi”-u shpreh një e moshuar.
Një student tha se është shumë penalizuese për të kapur orën e parë të mësimit.
“Unë jetoj në Laprakë dhe nuk e kap dot, nuk e ka fajin dhe pedagogu që na penalizon por skemi c bëjmë. Do dalësh një orë më parë por stacionet janë plot, nuk lënë vend as për virusin”- përfundoi studenti.
