Ditën e sotme në një deklaratë para gazetarëve, zv.kryeministri Erion Braçe ka komentuar edhe përgjimet e medias gjermane “Bild” që u publikuan vetëm para pak ditësh. Braçe është shprehur se këto përgjime nuk provojnë asgjë.
Braçe u shpreh se në asnjë prej përgjimeve të publikuara, nuk flitet për ofrim të parave për të këmbyer votën, por thjesht shefi i policisë së Dibrës ka ruajtur rendin nga një bandë që ka dhunuar përfaqësues të PS në disa prej qendrave në Maqellarë.
Sipas Braçes është Prokuroria ajo që duhet të vërtetojë vërtetësinë e këtyre përgjimeve.
“Shefi i policisë në Dibër ka ruajtur rendin nga një bandë që ka dhunuar përfaqësues të PS në disa prej qendrave, në Maqellarë, me pistoletë në dorë. Banda nuk i është bindur urdhrave të policisë në Dibër, duke goditur edhe makinën e policisë së shtetit.
Unë nuk jam brenda këtyre praktikave të zbardhjes, duhet të jetë prokuroria që duhet të vërtetojë autenticitetin, në ato që janë zbardhur”, u shpreh Braçe..
Braçe shton më tej:
“Duhet provohet autenticiteti i saj nga prokuroria jonë. Pjerin Ndreu nuk thotë që cilido mësues, apo mësuesit në Dibër nëse nuk votojnë për PS do të fluturojnë nga puna, por ka folur me dikë për një drejtues të PS që bën edhe drejtorin e shkollës, që nuk janë të ndaluar të merren me politikë dhe një përfaqësues i PS i kërkon një socialisti të votojë për partinë e tij.”
I pyetur se nëse e ka kërcënuar Ndreu mësuesin me largim nga puna, ai është shprehur se Ndreu ka identifikuar të dy personat edhe atë me të cilin ka folur dhe atë që ka përdorur atë shprehje, dhe ai nuk është i PD, por i angazhuar në PS sipas ligjit.
