Përgjaken rrugët e vendit, regjistrohet një tjetër aksident i rëndë në qytetin e Elbasanit në vendin e quajtur “Ura e Zaranikës”. Sipas informacioneve të para, një makinë tip “Ford” e drejtuar nga një femër ka përplasur një të ri, i cili po lëvizte në qytete me një skuter elektrik. I riu ndodhet në gjendje të rëndë shëndetësore dhe është dërguar në spitalin kirurgjikal. Mësohet se në vendin e ngjarjes ka mbërritur menjëherë policia e cila po punon për zbardhjen e plotë të rrethanave të ngjarjes.
Kujtojmë se ditën e sotme një aksident tragjik ndodhi rreth orës 8 e 23 të mëngjesit në aksin rrugor Fier-Vlorë, në vendin e njohur si “Kripa”, ku humbën jetën katër anëtarë të një familje të cilët sapo ishin kthyer nga Greqia dhe po shkonin me pushime në qytetin e Vlorës. Për pasojë ndërruan jetë në vend Eduart Gushi 44 vjeç, bashkëshortja e tij Silvana 33 vjeçe dhe dy vajzat e çiftit, Anastasia dhe Eva, 14 dhe 9 vjeç.
Po ashtu në orët e vona të pasdites u regjistrua një tjetër aksident në kryeqytet, ku sipas njoftimit zyrtar të policisë, rreth orës 19:00, në bulevardin “Bajram Curri”, një mjet me drejtues shtetasin M. H., ka aksidentuar 80-vjeçarin Q. K. Raportohet se i moshuari ndodhet në spital, nën kujdesit e mjekëve.
