Tre skenarë janë përgatitur nga qeveria për futjen në punë të spitaleve rajonale për të infektuarit me COVID-19, nëse situata përkeqësohet gjatë sezonit të dimrit.
Aktualisht vendi ka 4 spitale COVID-19 në Tiranë me një kapacitet prej 550 shtretërish, ku deri tani fluksin po e përballojnë COVID 1 dhe COVID 2, Spitali Infektivi dhe “Shefqet Ndroqi”, ku ndodhen të shtruar 234 persona të infektuar.
Në skenarin e parë: Hapen 5 spitale rajonale ku do të shtohen mbi 600 shtretër të tjerë.
Në skenarin e dytë: Hapen 4 spitale rajonale ku do të shtohen mbi 300 shtretër të tjerë
Në skenarin e tretë: Hapen 3 spitale rajonale ku shtohen mbi 200 shtretër të tjerë
Në total të 4 spitale COVID së bashku me spitalet rajonale do të ketë një kapacitete mbi 1600 shtretërish për të infektuarit në rast e ka shpërthim të vatrave të epidemisë, sidomos gjatë dimrit. Për shmangien e kësaj qeveria vendosi që nga e enjtja maska të jetë e detyrueshme jo vetëm në ambientet brenda, por edhe në rrugë, parke e kudo tjetër.
Ndërkaq, ministrja e Shëndetësisë Ogerta Manastirliu tha se shteti aktualisht siguron dy terapi të shtrenjta falas për qytetarët, për të trajtuar COVID-19 atë të plazmës imune dhe atë të Remdesivi. Ky i fundit është medikamenti që u përdor edhe për presidentin e SHBA-së, Donald Trumpi.
” Padyshim që në vjeshtë kërkohet që të rriten edhe më shumë kapacitete, për të cilat i kemi marrë masat. qoftë për të vijuar shtimin e personelit të epidemiologëve në gjithë ato zona edhe bashki ku rritja do të jetë më e madhe se në qarqet e tjera, kapacitete logjistike, testimet. Sot kemi dy laborator shtetëror ku testimet bëhen falas, ne përgatitemi për të rritur edhe më shumë numrin e tyre sidomos në shkolla, bizneset dhe ndërmarrje të mëdha”, tha Manastirliu
