Ka përfunduar procesi i rinumërimit dhe verifikimit të 94 kutive të votimit në zonat e Gramshit dhe Peqinit, pas kërkesës së paraqitur nga Partia Demokratike.
Gjatë kontrollit janë konstatuar disa parregullsi që ngjallin shqetësim mbi integritetin e procesit zgjedhor.
Nga verifikimi fizik i fletëve të votimit u evidentuan 15 fletë që mbanin vetëm një vulë, ndryshe nga sa kërkohet nga rregullorja e Komisionit Qendror të Zgjedhjeve, e cila detyron përdorimin e dy vulave për çdo fletë të vlefshme.
Gjithashtu, është konstatuar mungesë e fletëve të papërdorura në disa prej kutive, si dhe një fenomen i pazakontë, në disa raste, numri i fletëve të votimit rezulton më i lartë se ai i votuesve që kanë firmosur në listat e pjesëmarrjes.
Ndonëse këto parregullsi janë të dokumentuara, ende nuk është bërë e qartë nëse ndikojnë drejtpërdrejt në rezultatin përfundimtar të zgjedhjeve në këto dy bashki.
Të gjitha procesverbalet e konstatimeve do t’i dorëzohen Partisë Demokratike, e cila do të analizojë të dhënat dhe pritet të paraqesë kërkesat përkatëse në seancën e ardhshme të Komisionit të Ankimimeve dhe Sanksioneve.
