Kryeministri Edi Rama nuk ka qëndruar as 10 minuta në konsultimet në Presidencë në lidhje me propozimin e një date për zgjedhjet e ardhshme parlamentare.
Rama pranoi ditën e djeshme ftesën e presidentit Meta për konsultime në lidhje me caktimin e datës së zgjedhjeve të ardhshme, por sot ai ka qëndruar vetëm 10 minuta në zyrën e presidentit.
Rama është futur në presidencë me maskë ndryshe nga çfarë është shfaqur herët e tjera në ambiente publike pa asnjë masë mbrojtëse.
Në zyrë e ka pritur presidenti Meta, i cili në shenjë mirëseardhje e ka pyetur se çfarë do të merrte, kafe apo çaj.
Pas pritjes nga presidenti, mediat e pranishme janë nxjerrë jashtë zyrës, dhe takimi mes kryeministrit dhe presidentit më pas ka vazhduar me dyer të mbyllura.
Ndërkohë pas përfundimit të takimit, në dalje, kryeministri nuk ka folur për mediat në lidhje me detajet e takimit dhe se çfarë date ka propozuar Partia Socialiste.
Kujtojmë se më herët gjatë paradites së sotme, në zyrën e presidentit kanë qenë krerët e PDIU-së, LZHK-së, PBDNJ-së, si dhe përfaqësues të PR-së dhe PAA-së, të cilët propozuan në unison datën më të afërt që e lejon Kushtetuta për zgjedhjet e ardhshme parlamentare, datën 18 prill.
Pritet tashmë që pas kryeministrit Rama, në zyrën e presidentit Meta të shkojë kreu i PD-së, Lulzim Basha dhe zëvendëskryetari i LSI-së, Luan Rama.
Ndërkohë Kreu i Grupit Socialist, Taulant Balla, është shprehur pak javë më parë se sipas socialistëve, data më kuptimplotë për zgjedhjet parlamentare të ardhshme, do të ishte 9 maji, pasi përkon edhe me Ditën e Europës.
“Kur sezoni i zgjedhjeve ka ndryshuar, 9 maj i 2021-it është një datë kuptimplotë për zgjedhjet parlamentare të ardhshme. Ditë historike e simbolik, pasi përkon me Ditën e Europës. Ndaj presidenti i Republikës, ta shqyrtojë këtë datë, dhe ne socialistët do jemi të kënaqur, pasi është dita e fitores kundër nazi-fashizmit”, do të deklaronte Balla.
Ndërsa, palët i ndajnë dy data, do të jetë Presidenti i Republikës, Ilir Meta ai që do të caktojë datën, pas konsultimeve me të gjitha partitë, që po zhvillohen ditën e sotme në Presidencë.
