Ka përfunduar seanca e sotme ndaj ish-krerëve të UÇK-së në Gjykatën Speciale të Hagës, e cila ka zgjatur 3 orë e 40 minuta. Në sallë ishin të pranishëm pala mbrojtëse, prokuroria dhe gjyqtarët, ndërsa ish-krerët e UÇKA-së e ndoqën gjithçka onlilne.
Prokuroria nuk dha një datë specifike se kur do të nisë gjykimi, ndërsa gjyqtari Nicolas Guillou konfirmoi afatin e muajit tetor për dorëzimin e dosjes paraprake. Avokatët e Hashim Thaçit, Kadri Veselit, Jakup Krasniqit e Rexhep Selimit janë ankuar se materialet i janë dorëzuar me vonesë dhe kanë kërkuar gjithashtu që t’u dorëzohet lista e dëshmitarëve, gjë që nuk është pranuar nga Zyra e Prokurorit Special.
Pala mbrojtëse e Kadri Veselit tha se Prokuroria e ka pranuar që ndaj Veselit nuk ka prova kundër dhe kërkoi lirimin e tij me kusht, gjë që është refuzuar menjëherë nga prokurorët. Gjyqtari Nicolas Guillou propozoi në përfundim të seancës që konferenca e ardhshme të mbahet në 13 ose 14 shtator. Prokuroria nuk ra dakord me kërkesën, ndërsa nuk ka një datë të saktë për nisjen e gjyqit.
Thaçi, Veseli, Selimi e Krasniqi akuzohen për vepra që kanë të bëjnë me krime lufte, ndalimit të paligjshëm ose arbitrar, vrasjes së paligjshme , trajtimit mizor, torturës dhe vrasjes së paligjshme dhe krimet kundër njerëzimit të burgosjes, torturës, zhdukjes me forcë të personave dhe përndjekjes. Sipas Dhomave të Specializuara, këto vepra janë kryer midis marsit 1998 dhe shtatorit të vitit 1999.
