Raundi i tretë i bisedimeve të konfliktit midis Ukrainës dhe Rusisë ka përfunduar me “zhvillime të vogla pozitive” në lidhje me korridoret e mundshme humanitare, sipas raporteve.
Agjencia e lajmeve Reuters raportoi se një negociator ukrainas konfirmoi se kishte pasur zhvillime të vogla.
Krijimi i korridoreve për evakuimin e civilëve nga qytetet e shkatërruara nga lufta ka rezultuar i vështirë ditët e fundit, me Ukrainën që akuzon Rusinë për vazhdimin e bombardimeve të saj.
Civilë, duke përfshirë fëmijë, janë vrarë gjatë përpjekjes për të ikur.
Kujtojmë se delegacionet ruse dhe ukrainase zhvilluan këtë të enjte edhe raundin e dytë të bisedimeve ku sipas kreut të delegacionit rus Vladimir Medinsky, në këtë takim u diskutua për tre çështje që lidhen me situatën në Ukrainë.
“Ne diskutuam në detaje për tre çështje: çështjen ushtarake, çështjen ndërkombëtare humanitare, çështja e tretë është zgjidhja politike e konfliktit në të ardhmen”, tha ai.
Sipas Medinskyt, qëndrimi i Rusisë është i qartë dhe i është bërë i ditur delegacionit ukrainas në takim.
“Për disa pika, ne arritëm të gjenim mirëkuptim, por çështja kryesore që u zgjidh sot është çështja e shpëtimit të njerëzve, civilëve që u gjendën në zonën e përleshjeve ushtarake”, tha Medinsky.
Mikhail Podolyak, një anëtar i delegacionit ukrainas tha se po diskutohet edhe për mundësinë e një armëpushimi të përkohshëm “për periudhën kur do të kryhet evakuimi”.
