Ditën e sotme janë zhvilluar zgjedhjet për kreun e ri të SPAK, ku është zgjedhur më shumicë votash Altin Dumani.
Dumani është zgjedhur me pesë vota pro, pas seancës rreth gjashtë orë në Këshillin e Lartë të Prokurorisë.
Altin Dumani është kandidati që më herët përfolur në media si i preferuari i ambasadores amerikane, Yuri Kim.
Zgjedhja e të preferuarit të amerikanëve na bën të shpresojmë se situata e drejtësisë në vend mund të ndryshojë pozitivisht dhe SPAK do të ushtrojë funksionin e tij me rigozitet të plotë.
Për Altin Dumanin votuan:
1. Bujar Sheshi
2. Zeqir Hoda
3. Ledina Riza
4. Eloida Goxhi
5. Arta Mandro
Për Edvin Kondilin votuan:
1. Alfred Balla
2. Tartar Bazaj
3. Nurihan Seiti
4. Mirela Bogdani
Për Adnan Xholin votoi:
Sokol Stojani
Ndërkohë që në sallën e KLP ndodheshin përfaqësues të misioneve ndërkombëtare dhe përfaqësues të ambasadës Amerikane, përfshirë ambasadoren Yuri Kim.
Pra, Dumani tashmë do të marrë timonin e drejtimit të SPAK, duke zëvendësuar Arben Krajën.
Për rreth gjashtë orë Altin Dumani, Edvin Kondili dhe Adnan Xholi bënë prezantimet e tyre para trupës së KLP-së, ku treguan eksperiencat dhe objektivat e tyre.
Për zgjedhjen e kreut të ri të SPAK, KLP-ja vlerësoi shtatë kritere tek kandidatët për këtë pozicion: eksperienca në ndjekjen dosjeve sensitive të korrupsionit dhe krimit të organizuar, eksperiencën dhe aftësitë në organizimin dhe drejtimin e një strukture, eksperiencën në hartimin e miratimin e rregulloreve administrative, eksperiencën në çështje të cilat kanë marrë vëmendje të lartë publike dhe ndërveprim me median, aftësitë në drejtimin të burimeve njerëzore, vizionin për drejtimin e SPAK si dhe imazhin që ka në publik si prokuror.
Pak për Altin Dumanin:
Altin Dumani është prokurori i SPAK i cili udhëhoqi operacionin që çoi në pranga 13 persona, mes të cilëve edhe ish-gjyqtaren e Gjykatës së Krujës Enkeleda Hoxha, e cila lironte ‘të fortët” nga qelia.
Altin Dumani ka lindur në Shupenzë të Dibrës dhe vjen nga radhët e Prokurorisë së Apelit. Ai është një nga prokurorët që drejtoi i pari njësinë Task Forcë, ngritur vite më parë për të luftuar krimin e jakave të bardha.
Ka një karrierë prej 21 vitesh si prokuror, ndërsa në mars të vitit 1999 ai mori për herë të parë detyrën si prokuror në Sarandë. Ai u bë drejtues prokurorie për herë të parë në Tropojë, në vitin 2000.
Ai bëri bujë me qëndrimin e akullt që mbajti gjatë gjykimit të 29 të pandehurve të Gërdecit dhe 3 dënimet e përjetshme që kërkoi për tre nga të pandehurit kryesorë të tragjedisë së 15 marsit të vitit 2008.
